Բարի գալուստ REGnews

  Այսպիսով . . .
  Regnews կայքն արդեն իրողություն է: Իրողություն է, քանզի արդյունք է մեծ, շատ մեծ ցանկության, նվիրումի ու հավատքի:
  Կայքի հրատարակիչ ««Կովկաս-Ռեգիոն» տեղեկատվական-վերլուծական Կենտրոն» հասարակական կազմակերպությունը նպատակ է հետապնդում Հարավային Կովկասի տարածաշրջանային ինտեգրացման գաղափարը խոսակցությունների մակարդակից տեղափոխել իրական հարթություն: Ու փորձելով սույն կայքը դարձնել հատկապես երիտասարդ սերնդի երկխոսության հրապարակ` մենք իրականություն ենք դարձնելու ամենատարբեր խաղաղասիրական եւ մարդասիրական գաղափարներ, փորձելու ենք ջարդել գոյություն ունեցող կարծրատիպերը, քայլեր ենք անելու` խրախուսելու համար ազգամիջյան հանդուրժողականությունն ու բարիդրացիությունը, ստեղծելու ենք ազատ տեղեկատվական տարածություն` զերծ պատերազմի ու բռնության կոչերից, ազգամիջյան թշնամանքի հրահրումից, ժողովուրդների անհամատեղելիության կանխավարկածի տիրաժավորումից:
  Առկա է գիտակցումն այն բանի, որ ժառանգել  ենք բարդ ու խնդիրներով հարուստ աշխարհագրական տարածաշրջան, որ այդ խնդիրները ժամանակի ընթացքում է’լ ավելի են բարդացել, միեւնույն ժամանակ գոնե մեզ համար անհերքելի է, որ հատկապես ա’յս սերունդը պետք է ջանքեր գործադրի խաղաղ Հարավային Կովկասի գաղափարն իրականություն դարձնելու առաջին լուրջ, ինչու ոչ` նաեւ համարձակ քայլերն անելու ուղղութամբ, հակառակ պարագայում` հետագա սերունդերի համար սույն խնդիրն է’լ ավելի բարդ ու դժվար հաղթահարելի է լինելու:
  Ողջունում ենք կայքի այցելուներին, մեր պատրաստակամությունն ենք հայտնում` լինելու հետեւողական գործընկեր ու իրադարձությունների օպերատիվ արձագանքող,  տարբեր տեսակետներ ունեցող անհատներին կամրջող, իրական ու իրատեսական նախաձեռնությունների սկզբնաղբյուր:
  Ակնկալում ենք համագործակցություն համախոհ ու ոչ համախոհ անհատների, խմբերի, նախաձեռնությունների, կազմակերպությունների հետ այլ երկրներից, հատկապես` Հարավային Կովկասից: